သျှမ်းသံတော်ဆင့်

မြန်မာ့သတင်းစာရေးသားသကဲ့သို့ အစိုးရ နှင့် PNLO ပြည်ထောင်စုအဆင့် ငြိမ်းချမ်းရေးလက်မှတ်မထိုးရ
ကျားဖြူ၊ ကျားခေါင်း ပူးပေါင်း၍ သမိုင်းဝင်ကျားဖြူစေတီတော်အားပြန်လည်ပြုပြင်
အစိုးရသစ်လက်ထက် စစ်တပ်တွင်း နေရာ အပြောင်းအရွှေ့ပြုလုပ်

မြန်မာ့သတင်းစာရေးသားသကဲ့သို့ အစိုးရ နှင့် PNLO ပြည်ထောင်စုအဆင့် ငြိမ်းချမ်းရေးလက်မှတ်မထိုးရ

Posted: 07 Sep 2012 05:21 AM PDT

ပြီးခဲ့သည့်လက အစိုးရ၏ငြိမ်းချမ်းရေးဖော်ဆောင်ရေးကိုယ်စားလှယ်နှင့် ငြိမ်းချမ်းရေးဆွေးနွေးစဉ် ပအိုဝ်းအမျိုးသားလွတ် မြောက်ရေး အဖွဲ့ချုပ်က ပြည်ထောင်စုအဆင့်ဆွေးနွေးရန် အကြိုသဘောသာ ဆွေးနွေးခဲ့ရပြီး သဘောတူ လက်မှတ်ရေးထိုးသည့်အဆင့် မလုပ်ရကြောင်း PNLO ခေါင်းဆောင်တဦးက သျှမ်းသံတော်ဆင့်အား ပြောပြသည်။

မြန်မာ့အလင်းသတင်းစာပါအစိုးရ နှင့် PNLO ပြည်ထောင်စုအဆင့် ငြိမ်းချမ်းရေးဆွေးနွေးပွဲသတင်း(မြန်မာ့အလင်း)

"ကျနော်တို့ ဩဂတ်စ်လ ၂၅ ရက်တုန်းက အစိုးရရဲ့ငြိမ်းချမ်းရေးဖော်ဆောင်ရေးကိုယ်စားလှယ်တွေနဲ့ အပစ်ရပ်ငြိမ်းချမ်း ရေးဆွေးနွေးတာ ပြည်နယ်အဆင့်ဘဲဆွေးနွေးသဘောတူပါတယ်။ သို့ပေမယ့် မြန်မာ့အလင်းသတင်းစာမှာ ပြည်ထောင်စု အဆင့်ကိုပါ ဆွေးနွေးသဘောတူလက်မှတ်ထိုးကြပြီလို့ ထည့်သွင်းဖော်ပြထားတယ်။ တကယ်တော့ ကျနော်တို့ ပြည်ထောင် စုအဆင့်သဘောတူညီချက်လက်မှတ်ထိုးခဲ့တာမရှိဘူး၊ မြန်မာ့အလင်းက ဘာလို့အဲဒီလိုရေးလဲမသိဘူးဗျ" ဟု အမည်မဖော် လိုသည့် PNLO တာဝန်ရှိပုဂ္ဂိုလ်တဦးကပြောပါသည်။

ဩဂတ်စ်လ ၂၅ ရက်က PNLO မှ ခွန်မြင့်ထွန်း ဦးဆောင်သော အဖွဲ့နှင့် အစိုးရ၏ ပြည်ထောင်စု ငြိမ်းချမ်းရေး လုပ်ငန်း ဖော်ဆောင်ရေး ကော်မတီ ဒုတိယ ဥက္ကဌ ဦးအောင်မင်းတို့ သျှမ်းပြည်တောင်ပိုင်း တောင်ကြီးမြို့ တောင်ကြီးဟော်တယ်တွင် ပြည်နယ်အဆင့် ငြိမ်းချမ်းရေးဆွေးနွေးရာ သဘောတူညီချက် ၅ ချက်အပြင် ညနေပိုင်းတွင် ပြည်ထောင်စုအဆင့်ဆွေးနွေး ရန်အတွက်ပါ အကြိုဆွေးနွေးခဲ့ရကြောင်း၊ ပြည်ထောင်စုအဆင့်ဆွေးနွေးပွဲအား လာမည့်အောက်တိုဘာ၌ ထပ်မံတွေ့ဆုံ ဖွယ်ရှိကြောင်း ထိုစဉ်က တောင်ကြီးရောက် ဗိုလ်မှူးကြီးခွန်သူရိန်က သျှမ်းသံတော်ဆင့်သို့ ဤကဲ့သို့ ပြောပြဖူးပါသည်။

"နှစ်ဦးနှစ်ဘက်ယုံကြည်စိတ်ချမှုရှိဖို့ အချိန်ယူရမယ် ထို့အတွက် ဒုတိယအကြိမ်ပြုလုပ်မယ့် ပြည်ထောင်စုအဆင့် ဆွေးနွေးပွဲမှာလဲ ပွင့်ပွင့်လင်းလင်းဆွေးနွေးဖို့ ပိုမိုလိုအပ်တယ်" - ဟု ဗိုလ်မှူးကြီးခွန်သူရိန်က ဆို၏။

မြန်မာ့အလင်းသတင်းစာ၌ ထိုကဲ့သို့ထင် ယောင်ထင်မှားဖြစ်အောင်မှားယွင်းဖော်ပြထားမှုသည် ကြီးမားသော ပြဿနာ တခုမဟုတ်သည့်တိုင် အနာဂတ် မိမိတို့ကြား ယုံကြည်မှုတည်ဆောက်ရန် အတွက် အခက်အခဲဖြစ်စေကြောင်း အဆိုပါ အမည်မဖေါ်လို PNLO တာဝန်ရှိပုဂ္ဂိုလ်ကပြောသည်။

" အချင်းချင်း ယုံကြည်မှုတည်ဆောက်တယ်ဆိုတာ အမှန်တရားနဲ့တည်ဆောက်ရမှာဖြစ်တယ်။ မမှန်ကန်မှုနဲ့တည်ဆောက် လို့မရပါဘူး။ အဲဒီလို မီဒီယာမှာ မှားယွင်းဖော်ပြလိုက်တာ ကြီးမားတဲ့ ပြဿနာတခုမဟုတ်ဘူးဆိုပေမယ့် အသေးအမွှား ကိစ္စမှာတောင်ယုံကြည်လို့မရရင် ကြီးမားပြီး အရေးကြီးတဲ့ကဏ္ဍမှာ ဘယ်လိုလုပ် ယုံကြည်နိုင်ပါတော့မလဲ ဆိုတာတွေးစရာ တခု ဖြစ်လာစေတယ်" - ဟု အဆိုပါပုဂ္ဂိုလ်က သျှမ်းသံတော်ဆင့်အား ပြောပြသည်။

လက်ရှိတွင် သမ္မတဦးသိန်းစိန် ကမ်းလှမ်းသည့် ငြိမ်းချမ်းရေးကိစ္စအား လက်ခံဆွေးနွေးပြီး သဘောတူလက်မှတ်ထိုးသည့် တိုင်းရင်းသားလက်နက်ကိုင်တပ်ဖွဲ့ ၁၃ ဖွဲ့ရှိပြီးဖြစ်သည်။ အများအားဖြင့်လည်း ပြည်ထောင်စုအဆင့်သဘောတူညီမှု ရယူ နိုင်ခဲ့ကြသည်။

သို့သော် အပစ်ရပ်ထားသည့် သျှမ်းပြည်တပ်မတော် ၂ ဖွဲ့စလုံးနှင့် တိုက်ပွဲမကြာခဏ ဖြစ်ပွားနေသည့်အပြင် ရပ်ရွာ လူထု လည်း စစ်ဘေးစစ်ဒဏ်အလူအလဲခံနေရဆဲ ဖြစ်သည်။ ကချင်လွတ်လပ်ရေးတပ်မတော် KIA နှင့် အစိုးရ တို့ကမူ အကြိမ်ကြိမ် တွေ့ဆုံဆွေးနွေးသော်ငြားးလည်း အစိုးရက နိုင်ငံရေးကိစ္စ ဦးစားပေးဆွေးနွေးခြင်းမရှိသောကြောင့် ငြိမ်းချမ်းရေး တည်ဆောက်ရေးအတွက် အနှောင့်အယှက်ဖြစ်ခဲ့ရပြီး ယနေ့တိုင် တိုက်ပွဲများလည်း ဖြစ်ပွားနေဆဲဖြစ်သည်။

ကျားဖြူ၊ ကျားခေါင်း ပူးပေါင်း၍ သမိုင်းဝင်ကျားဖြူစေတီတော်အားပြန်လည်ပြုပြင်

Posted: 07 Sep 2012 05:19 AM PDT

ကျားဖြူပါတီခေါ် သျှမ်းတိုင်းရင်းသားများ ဒီမိုကရက်တစ်ပါတီ SNDP နှင့် ကျားခေါင်းပါတီခေါ် သျှမ်းတိုင်း ရင်းသားများ ဒီမိုကရေစီအဖွဲ့ချုပ် SNLD တို့ ပူးပေါင်း၍ နမ့်ခမ်းမြို့လည် ကျားဖြူစေတီ တော်မြတ် အား ပြန်လည်ပြု ပြင်မွမ်းမံနေ သည်ဟု ဒေသခံများက ပြောပါသည်။

နမ့်ခမ်းမြို့လယ် ကျားဖြူစေတီဘုရားအား ဆေးဖြူသုတ်ရန်ပြင်ဆင်ထားသည်ကိုတွေ့ရစဉ် (သျှမ်းသံတော်ဆင့်)

"ကျားဖြူ၊ ကျားခေါင်း ပေါင်းပြီး သာသနာ့နုဂ္ဂဟ ဆီကနေတဆင့် မြို့နယ်သာသနာရေးကို စာတင်တာ။ နအဖ အစိုးရ တုန်းက ကျားဖြူစေတီကို ရွှေဝါရောင် သုတ်ပစ်လိုက်လို့ အခုအဲဒါကို အဖြူရောင်ဆေးပြန်သုတ်မယ်။ အခုက ရွှေရောင် ခွါပြီး ပတ်တီးရိုက်ပြီး တဲ့အဆင့်ဖြစ်နေပြီ။ အဖြူပြန်သုတ်ဖို့ဘဲ ကျန်တော့ တယ်" - ကျားခေါင်း ခေါ် SNLD ပါတီဝင် လူငယ်တဦး ကပြောပါသည်။

ဩဂတ်စ် ၂၇ ရက်နေ့မှ စ၍ ကျားခေါင်း ခေါ် SNLD နှင့် ကျားဖြူ ခေါ် SNDP က ကမကထပြု၍ မြို့နယ် သာသနာ့ နုဂ္ဂဟ အသင်း၊ သျှမ်းစာပေယဉ်ကျေးမှုအဖွဲ့၊ ဒေသခံလူထုတို့ပူးပေါင်းကာ နအဖစစ်အစိုးရ ခေတ်က ရွှေဝါရောင်ဆေး သုတ်လိုက်သော နမ့်ခမ်းမြို့လယ် သမိုင်းဝင် ကျားဖြူစေတီတော်အား ကျပ်သိန်း ၃၀ ဆယ် အကုန်အကျခံကာ ဆေးဖြူပြန်သုတ် မည်ဖြစ်သည်။

"အလုပ်သမားက တရက် ၁၀ ယောက်လောက်ငှားထားတယ်။ နောက်ပြီး ဒေသခံလူထုတွေကနေ လုပ်အား ပေးလှူ ကြတာလဲရှိတယ်။ ၁၀ ရက်အတွင်း အဖြူရောင် အပြီး သုတ်ပြီးရင် ဘုရားအနေကဇာတင်၊ ရေစက် ချလှူဒါန်းမယ်" - ဟု သွားရောက်လုပ်အားပေးခဲ့သူ စိုင်းခမ်း ကပြောပါသည်။

စတင်တည်ထားကိုးကွယ်ကတည်းက အဖြူရောင်ဖြင့်သာရှိနေသော ကျားဖြူစေတီအား နအဖစစ်အစိုးရ လက်ထက် ၂၀၀၉ ခုနှစ်ကနမ့်ခမ်းမြို့နယ်၌ တာဝန်ကျသော ရဲမှူးကြီးလှဝင်း က ဦးဆောင်ပြီး ရွှေဝါရောင် ဆေးသုတ်လိုက်သည့် နောက်ပိုင်း နမ့်ခမ်းမြို့သည် တရက်တခြားအခြေအနေ ပိုမိုဆိုးရွား လာကြောင်း၊ စီးပွားရေးကျဆင်းရုံသာမက လူငယ် များ အကျင့်စာရိတ္တပျက်ပြားလာသည်ဟုဒေသခံများက ယူဆကြ၏။ ထို့အပြင် စစ်မက်ရေးရာဖြစ်ပွါးခြင်း၊ ဗုံးပေါက် ကွဲခြင်း၊ လုယက်သတ်ဖြတ်ခြင်း စသည့် ရာဇဝတ်မှုများလည်း နေ့စဉ်ရက်ဆက်ရင်ဆိုင်လာရသည်ဟု ဒေသခံ ရပ်မိ ရပ်ဖများကပြော၏။

နမ့်ခမ်းမြို့တွင် လွန်ခဲ့သောနှစ်ပေါင်း ရာချီက ကျားဖြူမင်းတကောင်ရှိခဲ့ကြောင်း ကျားဖြူမင်းက နမ့်ခမ်း လူထုအား အန္တရာယ်မပြုသည့်အပြင် ကာကွယ်စောင့်ရှောက်မှုပေးခဲ့သဖြင့် လူထုတို့၏ စိုက်ပျိုးသီးနှံများ အောင်မြင်ဖြစ်ထွန်းကာ ကျန်းမာချမ်းသာနေထိုင်လာခဲ့ရကြောင်း၊ ကျားဖြူမင်း မရှိတော့သည့်နောက်ပိုင်း နမ့်ခမ်းအား မြို့အဖြစ်စတင်တည် ထောင်သည့် အေဒီ ၁၇၇၇ ခန့်က မြို့သူမြို့သား များက ကျားဖြူမင်းအားရည်စူးပြီး နမ့်ခမ်းမြို့လယ်၌ ကျားဖြူ စေတီတော် တည်ဆောက်လှူဒါန်းခဲ့ကြောင်း၊ ဒုတိယ ကမ္ဘာစစ်က ဗုံးဒဏ်ထိမှန်သော်လည်း စေတီတော်၏ဘုန်းတန်ခိုး ကြောင့် မဟာမိတ်စစ်သည်များ ထိခိုက်ဒဏ်ရာ ရရှိခြင်းမရှိ ဟုယူဆသဖြင့် ကျားဖြူစေတီတော်၏ ဘုန်းရောင်ပိုမို ထင်ရှားလာခဲ့ကြောင်း နမ့်ခမ်းမြို့ သာသာနာ့နုဂ္ဂဟအသင်းဝင်များက ပြောပြ ပါသည်။

အစိုးရသစ်လက်ထက် စစ်တပ်တွင်း နေရာ အပြောင်းအရွှေ့ပြုလုပ်

Posted: 07 Sep 2012 05:18 AM PDT

သမ္မတဦးသိန်းစိန် ဦးဆောင်သည့် အစိုးရသစ်တက်လာပြီး ၂ နှစ်ခန့်အကြာတွင် မြန်မာ့တပ်မတော်အတွင်းရှိ စစ်အရာရှိ အတော်များများကို ယခုလဆန်းပိုင်းမှ စတင်၍ နေရာပြောင်းရွှေ့မှု ပြုလုပ်နေကြောင်း သိရသည် ။

ယခု စစ်ရာထူး အပြောင်းအလဲတွင် လက်ရှိ လက်နက်ကိုင်ပဋိပက္ခဖြစ်ပွားနေသော နယ်မြေများဖြစ်သည့် ကချင်ပြည်နယ် မြစ်ကြီးနားအခြေစိုက် မပခ စစ်တိုင်းမှူးနှင့် သျှမ်းပြည် (မြောက်ပိုင်း) လားရိူးမြို့ အခြေစိုက် ရမခ စစ်တိုင်းမှူးများ အပါ အဝင် အနည်းဆုံး စစ်တိုင်းမှူး ၅ ဦးခန့်၊ ကစထမှူးနှင့် တပ်မမှူးများ ပါ ရှိကြောင်း စစ်ရုံးချုပ်နှင့် နီးစပ် သူ တစ်ဦးက သျှမ်းသံတော်ဆင့်သို့ အတည်ပြုပြောသည် ။

မပခစစ်တိုင်းမှူး ဗိုလ်ချုပ်ဇေယျာအောင်အား မီးရထားဝန်ကြီး အဖြစ် လည်းကောင်း၊ ရမခတိုင်းမှူး ဗိုလ်မှူးချုပ် အောင်ကျော်ဇောအား တောင်ပိုင်းတိုင်း စစ်တိုင်းမှူးအဖြစ်လည်းကောင်း အသီးသီးပြောင်းရွှေ့လိုက်ကြောင်း သိရသည် ။

လစ်လပ်သွားသော မပခနှင့် ရမခ စစ်တိုင်းမှူး နေရာများသို့ ရလခတိုင်းမှူး ဗိုလ်မှူးချုပ် ထွန်းထွန်းနောင်နှင့် တပ်မတော် နည်းပညာ ကျောင်းအုပ်ကြီး ဗမခ အောင်စိုးတို့ ပြောင်းရွှေ့ ရောက်ရှိလာကြောင်း သိရသည် ။

၎င်းအပြင် လပခ ၊ တပခ ၊ ရလခတိုင်းမှူး များ၏နေရာများသို့ ကစထမှူးနှင့် တပ်မမှူးများ ပြောင်းလဲရောက်လာ ကြောင်း သိရသည် ။

လက်ရှိစစ်တပ်အပြောင်းအလဲ အပေါ် တရုတ် - မြန်မာနယ်စပ် စစ်ရေးလေ့လာသူ ဦးအောင်ကျော်ဇောက -
"ဒီအပြောင်းအလဲမှာ ထူးခြားချက် ၃ ခုလောက်သွားတွေ့တယ် conflict ဖြစ်နေတဲ့ နယ်မြေတွေကို ရောက် လာတဲ့ ထွန်း ထွန်းနောင်ဆိုရင် တိုက်ရင်းနဲ့ရာထူးတက်လာတာ။ ကိုအောင်စိုး ကလည်း စစ်သားမိသားစုထဲက ကြီးပြင်းလာပြီး လက်ရှိ တပ်မ ၈၈ က တိုက်နေတဲ့ သူတစ် ယောက် ပတ်ကားစစ်သားမိသားစုတွေထဲက ဖြစ် တယ်။ ကိုအောင်စိုးဆိုရင် ၂၆ အပတ် စဉ်မှာ ပထမဆုံးတိုင်းမှူး ဖြစ်လာတယ်။ ဒါဟာစစ်ရပ်ချင်လို့ မဟုတ်ဘူး ဆိုတာကို ပြတယ် "

"နောက်တစ်ခုက ဇေယျာအောင်ကို မီးရထားဝန်ကြီးခန့်တဲ့ကိစ္စမှာ စစ်တပ်ကနေ ၀န်ကြီးနေရာကို တိုက်ရိုက် သွားတယ် ဆိုတာ အရင်နအဖစစ်အစိုးရလုပ်ထုံး လုပ်နည်းအတိုင်း လုပ်နေတုန်းပဲဆိုတာကို သွားတွေ့တယ်။ နောက်တစ်ခုက မင်းအောင်လှိုင် သူဟာ သူ့ရဲ့ကာကွယ်ရေးဦးစီးချုပ်ဘဝမှာ သူ့ထက်ဂျူနီယာ အများကြီးကျတဲ့ အပတ်စဉ်ခွာတဲ့သူတွေကို ဆွဲတင်နေတာဖြစ်တယ်။ သူနဲ့ ၁၉ အပတ်စဉ်တူတဲ့လူ အားလုံးဆိုရင် နိုင်ငံခြားရေး ဝန်ကြီးရုံးကို ရောက်သွားပြီ အခု တစ်ခေါက် အပြောင်းအလဲမှာ ပိုပြီးသိသာလာတယ်။ ဗိုလ်နေဝင်းတုန်းကလို ဗိုလ်သန်းရွှေတုန်းကလို လုပ်နည်းတွေက ဘာမှမပြောင်းဘူးဆိုတာကို တွေ့ရတယ် " ဟု သုံးသပ်ပြောဆိုသည် ။