သျှမ်းသံတော်ဆင့်

သျှမ်းသံတော်ဆင့်

KIO ဋ္ဌာနချုပ်အနီး အစိုးရတပ် လှုပ်ရှားမှု စိပ်လာ

Posted: 05 Dec 2012 08:35 PM PST

KIO ဋ္ဌာနချုပ် တည်ရှိရာ တရုတ်နယ်စပ် အနီးရှိ လိုင်ဇာမြို့အနီးတစ်ဝိုက်တွင် အစိုးရတပ်၏ စစ်ရေးလှုပ်ရှားမှုများ စိပ်လာ သဖြင့် နှစ်ဘက်တိုက်ပွဲများ အချိန်မရွေး ဖြစ်လာနိုင်ကြောင်း KIA နှင့် ကျောင်းသားတပ် စစ်ဘက်သတင်း ရပ်ကွက်များက ဆိုသည် ။


အစိုးရတပ်များက လိုင်ဇာမြို့ အပြင်စည်း လုံခြုံရေးယူထားသော KIA နှင့် ABSDF ကျောင်းသားတပ်စခန်းများ အနီး တစ် ၀်ုက်တွင် ပို၍ လှုပ်ရှားလာရာ တပ်အသင့် ပြင်ဆင်ထားကြောင်း ကျောင်းသားတပ်မှူးတစ်ဦးက သျှမ်းသံတော်ဆင့်သို့ ပြောသည် ။

"အစိုးရတပ်တွေ တက်လာလို့ မနေ့ကတည်းက ပြင်ထားတယ်။ မိုးလဲချောင်း တစ်ဝိုက် မန်မော် ၊ မန်သဲရွာဘက်မှာ သူတို့ စစ်ကြောင်းတွေ ပျောက်သွားလိုက် ပေါ်လာလိုက် လှုပ်ရှားမှုတွေ မပြတ်ရှိနေတယ်။ စစ်ကစားနေတာပေါ့ ။တပ်တွေတော့ အသင့်လုပ်ထားရတယ် ။တကယ်လို့ တက်လာရင် အချိန်မရွေး တိုက်ပွဲတွေ ပြန်ဖြစ်လာနိုင်တယ် " ဟု ၄င်းက ဆိုသည် ။

ယမန်နေ့ကလည်း ကချင်ပြည်နယ် ပန်ဝါမြို့မြောက်ဘက် တရုတ် - မြန်မာ နယ်ခြားမှတ်တိုင် အမှတ် ၅ ၊ ၆ ၊ ရ တစ်ဝိုက်  နှစ်နေရာတွင် KIA နှင့် အစိုးရတပ်တို့ အကြား တစ်နေ့လုံးနီးပါး တိုက်ပွဲ ဖြစ်ပွားခဲ့ကြောင်း အမည်မဖေါ်လိုသူ  KIA အရာရှိ တစ်ဦးက ပြောသည် ။

အဆိုပါ တိုက်ပွဲအတွင်း အစိုးရတပ်မှ စစ်ရဟတ်ယာဉ်များ အသုံးပြု တိုက်ခိုက်သဖြင့် KIA ဘက်မှ ၁ ဦးကျဆုံး၍ ၁၀ ဦးခန့် ဒဏ်ရာရရှိပြီး ၃ ဦးမှာ ဒဏ်ရာပြင်းထန်ကြောင်း သူက ဆက်ပြောသည် ။

"ပန်ဝါတိုက်ပွဲကတော့ ဦးစခုန်တိန့်ယိမ်းက သူ့ရဲ့ဘိန်းစိုက်ဧရိယာမှာ အနှောက်အယှက် ဖြစ်တော့ မပခတပ်တွေ ခေါ်ပြီး ၀င်တိုက်တာပါ မနေ့မနက် ၆ နာရီလောက်ကနေ ညအထိ တစ်နေကုန်ဖြစ်တယ် ခလရ ၇၄ ၊ ၇၇ ၊  ၂၆၀ အဲဒီတပ်တွေ ပါတယ် ရဟတ်ယာဉ်တွေပေါ်ကနေလည်း ပစ်တယ် ဒီမနက်တော့ လေယာဉ်ပျံတွေ ထပ်ကြားရတယ်လို့ သိရတယ် တိုက်ပွဲ သတင်းတော့ အတိအကျမသိရသေးဘူး " ဟု ဆိုသည် ။

အစိုးရတပ်များ ဋ္ဌာနချုပ် လိုင်ဇာမြို့ တစ်ဝိုက် လှုပ်ရှားမှုရှိနေပြီး ယမန်နေ့က  လက်နက်ကြီးများဖြင့် ပစ်ခတ်မှု ရှိကြောင်း ဆိုသည် ။

"မနေ့က တုန်ဖုန်းယန် - ဗန်းမော်ကားလမ်းပေါ်ကနေ ၈၁ မမစိန်ပြောင်းနဲ့ ၁၅ ချက်လောက် လိုင်ဇာဘက် လှမ်းပစ်တယ်။ လျှောက်ပစ်တာဆိုတော့ တောထဲပဲကျတယ် ။ သူတို့တပ်တွေ လှုပ်ရှားမှုရှိတယ်။ သူ့ဘက် ကိုယ့်ဘက်ပေါ့ လှုပ်ရှားမှုတွေ ကတော့ ရှိနေတာပေါ့ " ဟု ၄င်းအရာရှိက ဆိုသည် ။

ယခုအခါ ကချင်ပြည်နယ် ၀ိုင်းမော်မြို့နယ် ပန်ဝါဒေသနှင့် သျှမ်းပြည် (မြောက်ပိုင်း ) မုံးကိုးဒေသတို့တွင် KIA နှင့် အစိုးရ တပ်တို့အကြား တိုက်ပွဲများ ဆက်ဖြစ်နေကြောင်း သိရသည် ။

ပြည်တွင်းစစ်ယမ်းငွေ့မပြယ် မိခင်တဦး၏ဒုက္ခပင်လယ်

Posted: 05 Dec 2012 08:34 PM PST

ကချင်လွတ်မြောက်ရေးတပ်မတော် KIA တပ်မဟာ ၃  ထိန်းချုပ်ဒေသဖြစ်တဲ့ ဗန်းမော်ခရိုင် အင်ဘာဘာ(N BA PA) တိုက်နယ်အတွင်းက ပုံစံတူ အပြာရောင် တဲအိမ်ထဲ မှာ ကလေးတွေ၊ အမျိုး သမီးတွေ၊ ဘိုးအိုဘွားအိုတွေ အများစုနဲ့အတူ အိုးခွက်ပန်းကန်သံတွေ ကလေးအော်ငိုသံတွေ ဆော့ကစားသံတွေနဲ့ အတူ ဆူညံနေပါတယ်။

001- NBB                                                 အင်ဘာဘာဒုက္ခသည်စခန်း

ဟောင်းနွမ်းပြီး မြေစေးတွေညစ်ပေနေတဲ့အဝတ်အစားလေးနဲ့အတူ ကလေးတစ်စု တဲအိမ်တွေကြား မြေကွက်လပ် လေးမှာ ပြေးလွှားဆော့ကစား နေပါတယ်။ သက်ကြီးပိုင်းအမျိုးသားတချို့ကတော့ နှီး တွေနဲ့  ပလိုင်းတွေ၊ ဒေါင်းလန်း တွေကို ယက်လုပ်နေပါတယ်။ အမျိုးသမီးတချို့ကတော့ ဒေါင့်လေးတခုမှာ မီးခိုးလုံးတွေနဲ့အတူ ချက်ပြုတ်နေပါတယ်။

002-NBBဘာမှမလုပ်နိုင်တော့တဲ့ ဘိုးဘွားတွေကတော့ တဲအိမ်တံခါးဝ မှာ ကန့်လန့်ထိုင်ပြီး နေပူစာလှုံနေ ပါတယ်။

သူတို့အားလုံးဟာ  မြန်မာတပ်မတော် နဲ့ ကချင်လွတ်မြောက်ရေးတပ်မတော် တို့ ၂၀၁၁ ဇွန်လ ၉ ရက်နေ့က  ငြိမ်းချမ်း ရေး ပျက်ပြားပြီး တိုက်ပွဲတွေ စဖြစ်ခဲ့တဲ့နောက်ပိုင်း မိမိနေရပ် ကနေစွန့်ခွာ ထွက် ပြေးလာတဲ့သူတွေပါ။

သူတို့စထွက်ပြေးလာတုန်းကတော့ တရုတ်ပြည် နောင်တောင်းမြို့နယ်ရှိ စစ်ပြေးဒုက္ခသည် စခန်းမှာ ၁ နှစ်နီးပါး နေထိုင် လာကြရတဲ့သူတွေပါ။ တရုတ်အစိုးရရဲ့ မောင်းထုတ်မှုကို ခံရပြီး အခု ဒီ နလန်စွပ်ဂျာ ဒုက္ခသည်စခန်းမှာ နေထိုင် လာကြတာ ၄ လ ကျော်ရှိ ခဲ့ပါပြီ။

အဲဒီ နလန်စွပ်ဂျာ ဒုက္ခသည်စခန်းမှာ အများအားဖြင့် ဗန်းမော်ခရိုင်က ကျေးလက်ဒေသခံ တွေဖြစ် ပြီး မိသားစု ၅၀၀ ကျော် လူဦးရေ နှစ်ထောင်ကျော်ရှိပါတယ်။ နလန်စွပ်ဂျာ ဟာ ကချင်လွတ်လပ် ရေးတပ်မတော် တပ်မဟာ ၃ ထိန်း ချုပ်နယ်မြေ တရုတ်နိုင်ငံ နယ်စပ် မိုင်းပ နှင့် ဆက်စပ်နေပြီး သျှမ်းပြည်မြောက်ပိုင်း နမ့်ခမ်းမြို့ အနောက် မြောက်ဘက် မိုင် 20 ခန့် ဝေးပါတယ်။   

သောကြာနေ့ စခန်းသန့်ရှင်းရေး အလှည့်ကျအဖွဲ့မှာပါဝင်တဲ့ အမျိုးသမီးကြီးတဦးက ပြေးထွက် လာပြီး မင်္ဂလာပါလို့ လက်ဆွဲပါတယ်။

ဖော်ရွေစွာ နုတ်ဆက်ပြီး သူ့မိသားစု နေထိုင်တဲ့ တဲလေးဆီကို အလည်လာဖို့ ဖိတ်ခေါ်ပါတယ်။ သူကတော့ ကလေး ၃ ယောက် မိခင် ကချင်အမျိုးသား နဲ့ အိမ်ထောင်ကျတဲ့ သျှမ်းအမျိုးသမီး "အေးစိန်" ဆိုသူပါ။
003-NBB
သူ့ရဲ့ခံစားချက်ကို အခုလိုပြောပြပါတယ်။

"ကျမတို့  တရွာလုံးက သေနတ်သံကြားတာနဲ့ အားလုံးထွက်ပြေးလာကြရတယ်၊ တချို့ရွာသားတွေ က ဗန်းမော်ဘက် ထွက်ပြေးကြတယ်။ ဗန်းမော်ဘက်ပိုဒုက္ခရောက်မှာစိုးလို့ ဒီတရုတ်ဘက်ခြမ်းကို ထွက်ပြေးလာရတာပါ"

နန်းအေးစိန် မိသားစုဟာ ဗန်မော်ခရိုင်အနီး၊ ယန်ဟူးရွာမှာနေထိုင်ပြီး တောင်ယာစပါးနဲ့ ဟင်းသီး ဟင်းရွက်စိုက်ပျိုး လုပ်ငန်းနဲ့ အေးချမ်းစွာအသက်မွေးဝမ်းကျောင်းပြု   နေထိုင်လာရင်းနဲ့  သေနတ်သံ တဒိုင်းဒိုင်းထွက် လာတဲ့နေ့တနေ့မှာဘဲ ဘဝပျက်သွားခဲ့ရတာလို့ပြောပါတယ်။

ဇွန်လ ၁၀ ရက်ကျော်ကျော်မှာ သေနတ်သံလား ဗျောက်အိုးသံလား မိုးခြိမ်းသံလားလို့ ဝေခွဲမရ စဉ်အခါမှာ အကျီ င်္ဘောင်းဘီ အစိမ်း နဲ့ လူတအုပ်ရွာထဲ ပြေးဝင် လာတယ်။ အနီးကပ်ရောက်လာ တော့ သူတို့တွေဟာ ကချင်စစ်သား KIA စစ်သားတွေပါဘဲ။

ကချင်လိုလာ ပြောနေကြပြီ၊ "ခုဒီနားမှာ တိုက်ပွဲစဖြစ်နေပြီ အားလုံး စစ်မဖြစ်တဲ့ဒေသကို ခဏတိမ်း ရှောင်ပေးကြပါ" လို့ စစ်မိန့်နဲ့လာတော့ တရွာလုံး ရုတ်ရုတ်သဲသဲ ဖြစ်သွားရတယ်။

"ကျမလည်း အငယ်ဆုံး သားလေးကို ကျောမှာပိုး ၊သမီး နှစ်ယောက်လက်ကို ဆွဲပြီးတော့ ငိုယို ရင်း ထွက်ပြေးတယ်။ ကျမယောက်ျားက ရရာအသုံးအဆောင်တွေ သယ်ယူရင်းနဲ့  နှစ်ရက်နှစ်ည နဲ့ ဒီကို ခြေလျင်နဲ့ လာကြရပါတယ်၊ စထွက်ပြေးလာတုန်းက ခဏလေးပဲ ထွက်ပြေးရမယ် ထင်နေတာ။ ခုတော့ ကျမတို့ ရွာကို ပြန်မရောက်တာ တစ်နှစ် ကျော်ရှိလာပြီ" လို့ အေးစိန် က ပြောပါတယ်။

နလန်စွပ်ဂျာ ဒုက္ခသည်စခန်းဟာ တရုတ်ပြည် နောင်တောင်းထက် နေထိုင်ရတာ ပိုအေးချမ်းမှု ရှိနေပြီး၊ အလယ်တန်း စာသင်ကျောင်းဆောင်၊ မူကြိုကျောင်း၊ ကျန်းမာရေးဆေးပေးခန်း စတာတွေလဲရှိပါတယ်။

ပြည်တွင်းအလှူရှင်တွေနဲ့  KIO  တို့က ထောက်ပံ့ပေးထားတဲ့ ဒုက္ခသည်စခန်းဖြစ်ပါတယ်။

"တရုတ်ဘက်နေရတာထက် ဒီမှာနေရတာတော့စိတ်ပျော်ပါတယ်၊  ၅ နှစ် အထက် လူတယောက် ကို ဒုက္ခသည် ကူညီပေးရေးကော်မတီ က တစ်လ ဆန် ၆ ပြည် နဲ့ ဆီ ၁ လီတာ ပေးတယ်။ ဒါပေမဲ့ အဓိက လိုနေတာကတော့ ငွေပဲ၊ ကျမအငယ်ဆုံးသားဆိုရင် မုန့်ဖိုး တရုတ် (၅ ကျော့) မြန်မာ ၆၀ ကျပ် မရရင် ကျောင်းမသွားဘူး" -လို့ အေးစိန် က ပြောပါတယ်။

အရင်က သူတို့တွေဟာ ကိုယ်ပိုင်တောင်ယာ လုပ်ငန်းကို လွတ်လွတ်လပ်လပ်လုပ်ကိုင်စား သောက်လာရ တဲ့သူ တွေဖြစ်ကြပြီး ခုတော့ သူ့အမျိုးသားက မိသားစုဝင်ငွေ ရဖို့အတွက် ဒီဒေသနဲ့ အရမ်းဝေးတဲ့ နေရာ တခုမှာ နေ့စားအလုပ်သမားအဖြစ် စပါးသွားရိတ် တာ ၁၅ ရက်လောက်ရှိနေပြီ။ ငွေရပြီး ယောက်ျား ပြန်လာမယ့်နေ့ကို နေ့တိုင်းစောင့်မျှော်နေတယ်လို့ ပြောပါတယ်။

"ထမင်းတော့ ကောင်းကောင်းစားရတယ်၊ ဟင်းသီးဟင်းရွက်ကတော့ ပိုက်ဆံရှိရင် ၀ယ်စား တယ်၊ ပိုက်ဆံ မရှိရင် တော့ နီးစပ်ရာ တောတောင်ထဲ ရှာစားရတာပေါ့" လို့ သျှမ်းအမျိုးသမီး အေးစိန် က သူရဲ့ နေ့စဉ် စားသောက်နေရပုံ ကို ရှင်းပြပါတယ်။

စစ်အမြန်ပြီးဆုံးပြီး အိမ်ပြန်ရဖို့က ဒုက္ခသည် အားလုံးရဲ့ အမြင့်ဆုံးမျှော်လင့်ချက်ဖြစ်ပေမယ့် စစ်ပွဲ က မပြီးနိုင်တဲ့အပြင် ပိုပြီးစိပ်လာတာတွေ့နေရပါတယ်။

"တကယ်လို့ စစ်ပွဲ ပြီးသွားခဲ့ရင် မိမိရပ်ရွာနေအိမ်မှာဘဲ ပြန်နေဖို့ မျှော်လင့်ကြတယ်။ ဒါပေမယ့် ဟိုးအရင် တိုင်း လုပ်ကိုင်စားသောက်လို့ရမှာလားတော့မသိဘူး။ စထွက်လာတုန်း က နွားနှစ် ကောင် ၊ တဲအိမ် နဲ့ တောင်ယာ တွေရှိခဲ့ပြီး ခုတော့ ဒီဟာတွေ အားလုံး မရှိနိုင်တော့ဘူး၊ ထွက် ပြေးလာတာ ၁ နှစ်ကျော်ပြီ။ နွားလေးနှစ်ကောင်လဲ ဗမာစစ်သားတွေက သတ်ဖြတ် စားသောက် လိုက်ပြီလို့ကြားရတယ်" -  လို့ပြောပါတယ်။

ပြည်တွင်းစစ်ကြီး မပြီးသေးသရွေ့ ဒေသခံကျေးလက်ရွာသားတွေရဲ့ ဒုက္ခက ပြီးဆုံးနိုင်မှာမဟုတ်ဘူး။ သူတို့မြတ်နိုးတဲ့ သူတို့မွေးရပ်မြေမှာ သေနတ်သံတွေ  သွေးညှီနံ့တွေနဲ့ ယမ်းငွေ့တွေ မပြယ်သေး သရွေ့ အိမ်ပြန်ရဖို့ မလွယ်တဲ့အပြင် အဲဒီဒုက္ခသည်စခန်းမှာ ဘယ်အချိန်အထိ နေထိုင်ရမယ် ဆိုတာလဲ မခန့်မှန်းနိုင်တော့ပါဘူး။

"ဒီ ပြည်တွင်းစစ် ဘယ်တော့ ပြီးမှာလဲ၊ ကျမတို့ရပ်ရွာ ဘယ်တော့ ငြိမ်းအေးမှာလဲ"---- လို့ တိုးတိုးလေး ညည်းပြီး အေးစိန်တယောက် မျက်ရည်ကျလာပါတော့တယ်။

ရေနံ/ဂက်စ်ပိုက်လိုင်းမှ ဘေးရန်ကင်းရှင်းရေး သျှမ်းပြည်၌ပထမဦးဆုံးဆုတောင်းပွဲလုပ်

Posted: 05 Dec 2012 08:32 PM PST

ဆားထွက်သည့်နယ်မြေအတွင်းဂက်စ်ပိုက်လိုင်းဖြတ်သန်းမှုကြောင့် အချိန်မရွေးပေါက်ကွဲနိုင်သည့် အရေးတွေးပူကာ သျှမ်းပြည်မြောက်ပိုင်း သီပေါမြို့ဒေသခံများ " ဘေးကင်းရန်ကင်းဆုတောင်းပွဲနှင့် ပရိတ်ရွတ်ဖတ်ပွဲ" တရပ် ယနေ့ကျင်း ပခဲ့ကြောင်း စုံစမ်းသိရှိရပါသည်။

Gas pipeline at Sipawသီပေါမြို့နယ်အတွင်းဖြတ်သန်းသော ဂက်စ်ပိုက်လိုင်း (ဓါတ်ပုံ- သျှမ်းသံတော်ဆင့်)

" ဒီနေ့ ဒီဇင်ဘာ ၅ ရက်နေ့ မနက် ၉ နာရီကနေ ၃ နာရီအထိ ကျနော်တို့ သီပေါသားတွေ စုပေါင်းပြီး ဆုတောင်းပွဲ လုပ်ကြ တယ်။ သံဃာတော် ၄ ပါးပင့်ပြီး ပရိတ်ရွတ်တယ်။ ရည်ရွယ်ချက်ကတော့ ဂက်စ်ပိုက်လိုင်းပေါက်ကွဲမှုမဖြစ်အောင်ပေါ့နော်။ ဘေးကင်းအောင်ပေါ့" ဟု သီပေါမြို့ခံ စိုင်းဝင်းက ပြောပါသည်။

လူမှုရေးလှုပ်ရှားသည့် အဖွဲ့တဖွဲ့က ဂက်စ်ပိုက်လိုင်း ဖြတ်သန်းမှု၏ ကောင်းကျိုး ဆိုးကျိုးများကို ဒေသခံလူထုထံ မကြာခင် က ပညာပေး ပြောပြရာမှ ယခုကဲ့သို့ ဆုတောင်းပွဲကျင်းပရန်ဆုံးဖြတ်ခဲ့ကြခြင်းဖြစ်ကြောင်း စိုင်းဝင်းကပြောပါသည်။

သီပေါမြို့နယ်သည် ဆားထွက်ရာဒေသဖြစ်ရာ မြေသားမြေထုမှာလည်း ဆားဓါတ်ပါနေသဖြင့် ပိုက်လိုင်းများသံ ချေး တက်လွယ်ကာ ပိုက်လုံးပေါက်ကွဲမှုဖြစ်လာနိုင်ကြောင်း၊ ပိုက်လိုင်းသွယ်တန်းထားရာတွင်လည်း  ပေါက်သည်ဟု ယူဆနိုင် မည့် အရာများအား ကတ္တရာစေးပါးပါးလူးထားသည်ဖြစ်ရာ မကြာမီပြန်လည်ပေါက်ပျက်နိုင်ကြောင်း ၊ ပေါက်ကွဲ ပါကလည်း ၈ မိုင်ပတ်လည် အထိ ထိခိုက်နိုင်ကြောင်း အဆိုပါ ပညာပေး အဖွဲ့က ပြောဆိုသွားကြောင်း  ဆုတောင်း ပွဲဖြစ်မြောက်ရေး ဆောင်ရွက် သူတဦး ကလည်းပြောပါသည်။

" ဒီပိုက်လိုင်းတွေကြောင့် ကျမတို့ မြို့ခံတွေ ဒေသခံတွေဘက်က ဆုံးရှုံးတာများနေပါပြီ။ ဒီပိုက်လိုင်းဟာဖြင့် ကျမတို့အတွက် ဘာမှကောင်းကျိုးမခံစားရပါဘူး။ လယ်ယာမြေတွေဆုံးရှုံးတယ်။ လျော်ကြေးတွေလည်း အပြည့်အ၀ မရကြဘူး။ ပိုက်လိုင်း လုံခြုံရေးစစ်ကြောင်းတွေနဲ့ ကျမတို့ ဒီဘက်မှာလှုပ်ရှားနေတဲ့ တိုင်းရင်းသားလက်နက်ကိုင်တပ်ဖွဲ့တွေ မကြာခဏတိုက်ပွဲဖြစ် တယ်။ ဒီဒုက္ခတွေ ကျမတို့ ရင်မဆိုင်ချင်တော့ပါဘူး။ ပေါက်ကွဲမှုမဖြစ်အောင်ဘဲဆုတောင်းကြရမှာပေါ့ ဟု ဆုတောင်းပွဲဝင် သည့် ဒေသခံအမျိုးသမီးတဦးကလည်းပြောပါသည်။

ယနေ့မနက် ၉ နာရီက စတင်သော " ဘေးကင်းရန်ကင်းဆုတောင်းပွဲနှင့် ပရိတ်ရွတ်ဖတ်ပွဲ" ကို သမိုင်းဝင်ဘော်ကြို ဘုရား အနီး မော်ကေရွာတွင် ကျင်းပခဲ့သည်။ ဝမ့်ကောင်ရွာ၊ ဝမ့်ကတ်ရွာ၊ ပန်ကေရွာ၊ ဟိုမော် ရွာနှင့်ပန်ကီရွာ ၅ ရွာက စုပေါင်း ကျင်းပခဲ့ခြင်းဖြစ်သည်။ အယောက် ၁၀၀ ထက်မနည်း တက်ရောက်ဆုတောင်းကြပြီး ဆုတောင်းပွဲကို လွတ်လွတ် လပ်လပ် ဖြင့်ပထမဦးဆုံးလူသိရှင်ကြား ကျင်းပနိုင်ခဲ့ကြောင်းလည်း စိုင်းဝင်းကပြောသည်။

ပရိတ်ရွတ် ဆုတောင်းပြီးနောက် ပိုက်လိုင်းမှဖြစ်ပေါ်သော အန္တရာယ် ကာကွယ်တားဆီးနိုင်ရေး အတွက်ဆက်လက် ပြောပြ သွားရန်နှင့် သျှမ်းပြည်တဝှမ်းလုံးလက်တွဲ၍ ပိုက်လိုင်းသွယ်တန်းမှုရပ်တန့်ရေး တညီတညွတ်တည်းတောင်းဆိုကြရန် တိုက်တွန်းပြောဆိုခဲ့ကြောင်း ၎င်းကဆက်လက်ပြောပြသည်။

ရခိုင်ပြည်နယ် ကျောက်ဖြူဆိပ်ကမ်းမှ တရုတ်ပြည် ယူနန်ပြည်နယ်အထိသွယ်တန်းမည့် ရွှေဂက်စ်၊ ရွှေရေနံ ပိုက်လိုင်း စီမံကိန်းသည် မြန်မာ- တရုတ် ရေနံနှင့် သဘာဝဓါတ်ငွေ့ ပိုက်လိုင်းကို တရုတ် အစိုးရ ပိုင်"တရုတ်အမျိုးသားရေနံကော်ပို ရေးရှင်း China National Petroleum Corporation (CNPC) ကတာဝန်ယူကာ  ၂၀၁၀ ပြည့်နှစ်တွင်  စတင်ခဲ့ပြီး  မကွေး၊ မန္တလေး နှင့် သျှမ်းပြည်မြောက်ပိုင်း အပါအဝင် မြို့နယ် ၂၀ ကျော်ဖြတ် သန်း ကာ လာမည့် ၂၀၁၃ ခုနှစ် တွင်အပြီး ဆက်သွယ်ဖေါက်လုပ်မည်ဖြစ်သည်။